Балалар өсөн әҙәбиәт сәғәте

Ҡаланың 4-се һанлы лицейының 3 класс уҡыусылары өсөн әҙәби сәғәт үтте. Был сараны Баймаҡ балалар модель китапханаһы хеҙмәткәре Гөлназ Сабирова ойошторҙо. Китапханасылар һәр ваҡыт тиерлек үҙ уҡыусыларына яңы китаптар, юбиляр авторҙар һәм уларҙың ижады, тормош юлы хаҡында мәғлүмәт биреп барырға тырыша. Бөгөнгө был сара ла, башҡорт яҙыусыһы, журналист Динис Бүләковтың тыуыуына 80 йыл тулыу айҡанлы ойошторолдо. Уҡыусылар яҙыусының “Зәңгәр офоҡтар” исемле китабы менән танышты, уның ижадына, тормош юлына, башҡа китаптарына байҡау яһаны. Китапханасы балалар өсөн ижад ителгән “Эҫе ҡар”, “Упҡын ситендә бейеү”, “Саған япраҡ яңырта” исемле повестарынан ҡыҙыҡлы өҙөктәр уҡып ишеттерҙе, китапты биҙәгән иллюстрациялар тураһында һөйләне. Әйткәндәй, был китап балалар төшөргән һүрәттәр менән биҙәлгән, хатта улар араһында яҙыусының үҙенең ейәнсәрҙәренең дә һүрәттәре бар. Был әҙәби сәғәт балаларға бик тә оҡшаны, улар автор, әҫәр тураһында биргән һорауҙарына яуаптар алдылар.