Башҡорт теле көнө

14 декабрь республикабыҙҙа башҡорт теле көнө билдәләнә. Был иҫтәлекле дата башҡорт телен һаҡлау, яҡлау һәм үҫтереү маҡсатында, Башҡортостан Республикаһы Башлығы Р. Ф. Хәбировтың указына ярашлы 2019 йылдан башлап үткәрелә.
Шул уңайҙан, Баймаҡ балалар модель китапханаһында ҡаланың “Күбәләк” балалар баҡсаһы кескәйҙәре өсөн байрам үтте. Балалар туған телде яратырға, ҡәҙерләргә, хөрмәт итергә кәрәклеген белделәр, башҡорт халҡының мәҙәниәте, йолалары, халыҡ уйындары менән таныштылар. Бик ҙур теләк менән “Тирмәкәй”, “Ат сабышы”, ҡалаҡ менән йомортҡа тотоп йүгереү уйындарында ҡатнаштылар.
Аҙаҡ, балалар өсөн китапхана буйлап экскурсия ойошторолдо, кескәйҙәр китаптар, журналдар менән танышты.Тәрбиәселәре Миңниса Хәсәнова һәм логопед-тәрбиәсе Зилә Мочалина китапханаға яҙылып, төркөмдә уҡыр өсөн китаптар алып ҡайттылар.